General

மாடாய் உழைப்பவர்கள்…!

By  | 

வியாபாரி ஒருவன் தனது ஊரிலிருந்து தினமும் சரக்கு மூட்டைகளை கொண்டு சென்று பக்கத்து ஊர் சந்தையில் விற்பதை தொழிலாக கொண்டிருந்தான். இதற்காக மாட்டுவண்டி ஒன்றை அவன் வைத்திருந்தான்.

ஒரு நாள் அவன் வண்டியில் பூட்டும் மாடு அவனிடம் வந்து ‘எஜமான்! இரண்டு ஆண்டுகளாக நான் உங்களிடம் வேலை செய்கிறேன். ஆனால், நான் செய்யும் வேலைக்கு நீங்கள் எனக்கு சாப்பிட கொடுக்கும் புல்லின் அளவோ மிக குறைவு. தயவு செய்து எனக்கு நீங்கள் கொடுக்கும் புல்லின் அளவை அதிகரியுங்கள்’ என்றது.

மாடு சொன்னதை கவனமாக கேட்ட வியாபாரி ‘மாடே! நீ கடினமாக உழைப்பது உண்மையே. ஆனால், பக்கத்து வீட்டுக்காரன் மாடு 25 மூட்டைகளை தன் வண்டியில் சுமக்கிறது. ஆனால், நீயோ தினமும் 20 மூட்டைகளை மட்டுமே சுமக்கிறாய். நீ அதிக மூட்டைகளை சுமந்தால் உனக்கு புல்லின் அளவை அதிகரிப்பதை பற்றி யோசிக்கிறேன்’ என்றான். பக்கத்து வீட்டு மாடு பஞ்சு மூட்டைகளை மட்டுமே சுமக்கிறது என்பதை அறியாமல் இந்த மாடும் அதிக மூட்டைகளை சுமக்க ஒப்புக்கொண்டது.

இப்படியே ஓராண்டு சென்றது. மாடு மீண்டும் வியாபாரியிடம் புல்லின் அளவை அதிகரிக்க கேட்டது. அவன் சொன்னான்:

‘மாடே! அதிக பாரம் ஏற்றியதால் நம்முடைய பழைய வண்டி பாதிப்படைந்துவிட்டது. எனவே, நான் இப்போது புது வண்டி செய்ய சொல்லியுள்ளேன். அதற்கு செலவாகும். இன்னும் சில நாட்கள் பொறுத்துக்கொள். நான் புல்லின் அளவை நிச்சயம் அதிகரிப்பேன்.’ வேறு வழியின்றி மாடும் ஒத்துக்கொண்டது.

புது வண்டி வந்த ஆறு மாதங்களுக்கு பின் மாடு மீண்டும் வியாபாரியிடம் கோரிக்கை வைத்தது. அவனோ, ‘மாடே! இப்போதெல்லாம் உனது வேகம் மிக குறைந்துவிட்டது. பக்கத்து ஊருக்கு செல்ல முன்பை விட அதிக நேரம் எடுத்துக்கொள்கிறாய். இதனால் எனது வியாபார நேரம் குறைந்துவிட்டது. உனக்கு அதிக புல் தருவது இப்போதைக்கு சாத்தியமில்லை’ என்றான்.

கோபமடைந்த மாடு ‘இந்த புது வண்டியின் பாரம் பழைய வண்டியை விட மிக அதிகம். இந்த கனத்தையும் சேர்த்து இழுக்க வேண்டியதாலேயே என்னால் முன்பு போல விரைவாக செல்ல முடியவில்லை’ என்றது.

‘நீ என்ன காரணம் சொன்னாலும் உன்னால் எனக்கு அதிக லாபத்தை பெற்றுத்தர முடியவில்லை. நான் உன் மேல் ஏற்றும் மூட்டைகளின் எண்ணிக்கையை வேண்டுமானால் குறைத்துவிடுகிறேன். ஆனால், நீ அதிக புல் கேட்காதே’ என்றான்.

தன் இத்தனை ஆண்டு உழைப்பும் வீணாகிவிடும் என்று பயந்த மாடு ‘வேண்டாம் எஜமான்… நான் எப்படியாவது வேகமாக சென்று, உங்களுக்கு அதிக லாபம் பெற்று தந்துவிடுகிறேன்’ என்று கூறியது.

சொன்னது போல், தன் சக்தியெல்லாம் திரட்டி வேகமாக ஓட ஆரம்பித்தது. முன்பு போல் உரிய நேரத்திலேயே பக்கத்து ஊருக்கு சென்று வியாபாரியை சேர்க்கத் தொடங்கியது. ஆனால், மிக கடின உழைப்பால் ஒரே மாதத்திலேயே நோயுற்று படுத்த படுக்கையானது. வழக்கமாக சாப்பிடும் புல்லை கூட அதனால் சாப்பிட முடியவில்லை. அதன் நோயை குணப்படுத்த மருந்து கொடுத்த வியாபாரி, ஒரு நாள் அதனிடம் ‘மாடே! உன்னை நல்ல விலைக்கு ஒருவர் கேட்கிறார். அவரிடம் உன்னை விற்றுவிடப் போகிறேன்’ என்றான். ‘எஜமான்! நான் இப்போது இருக்கும் நிலைமையில் என்னால் எந்த வேலையும் செய்யமுடியாது. என்னை ஏன் அவர்கள் விலைக்கு கேட்கிறார்கள்?’ என்றது. ‘அவர்கள் உன்னை வேலை வாங்குவதற்காக வாங்கவில்லை. உன்னை கொன்று உன் தோலை எடுக்கவே விலைக்கு கேட்கிறார்கள்’ என்றான் வியாபாரி.

வியாபாரி சொன்னதை கேட்டதும் மாட்டுக்கு கண்ணீர் வந்தது. ‘எஜமான்! நீங்கள் செய்வது அநியாயம். உங்கள் பேச்சை நம்பி மாடாய் உழைத்ததாலேயே நான் நோயுற்றேன். இல்லாவிடில், நான் நீண்டகாலம் ஆரோக்கியமாக இருந்திருப்பேன். நீங்கள் செய்தது துரோகம்’ என்றது. அதை கேட்ட வியாபாரி, ‘நான் செய்தது துரோகம் இல்லை.

ஒரு எஜமானனின் லட்சியம் தன் தொழிலாளியிடம் முடிந்தளவு அதிக வேலை வாங்கி இலாபம் பெறுவது. நான் அதையே செய்தேன். உன்னால் ஐந்து ஆண்டுகளில் சம்பாதிக்கவேண்டிய பணத்தையும் மூன்றே ஆண்டுகளில் சம்பாதித்துவிட்டேன்.

இப்போது உன்னை விற்பதன் மூலமும் பணம் சம்பாதிக்கப்போகிறேன். எனது அதிக லாபம் பெரும் நோக்கம் நிறைவேற உனது ஆசையை மூலதனமாக்கிக்கொண்டேன். நீ முதல் முறையிலேயே சுதாரித்திருந்தால் தப்பித்திருக்கலாம்’ என்றான். மாடு தன் முட்டாள் தனத்தை எண்ணி நொந்துகொண்டது.

You must be logged in to post a comment Login